الزجالة : المرحومة فاطمة شبشوب
كتبها نهاد بنعكيدا ، في 19 أكتوبر 2007 الساعة: 00:11 ص
من مواليد 1952 بمدينة فاس ، عملت أستاذة سيميائيات المسرح بكلية الآداب جامعة مولاي اسماعيل بمكناس .
ـ صدر لها سنة 1997 كناش زجلي « طبيق الورد» وهو أول كناش زجلي مطبوع لزجالة مغربية معاصرة.
توفيت صيف 2006 ودفنت المرحومة بمقبرة الشهداء بالرباط.
يا السايل عني
يا السايل عني برضى
لا تسال عني ناي ولا عيدان
الناي بلا ريح ما يسواشي
ولا لي بلا وترة ف العود ألحان
لاتسال عني وردة
لا تذبال ف يديك وراقها والألوان
وراقها كانت فراشي
وألوانها غطى راشي وبلا ثمان
لا تسال عني طاير
جولاته وحده ف تنسيق الجولة والألوان
جولاته ماتكفينيشي
وألحانه ما تحكي نغمة ف صدر الأمان
لا تسال عني قمرة
ولا نجوم عناقدها كيف التيجان
التيجان وماتضوينيشي
عناقدها حجر ماشي على ما كان
لا تسال عني صحرا
ولا جنان عوادها مخبلة على ويدان
غصانه ماتشبهنيشي
وويدانه ما تلحق ريقي بعسل منان
وإلا سال عني صدرك
لما الأهذاب تزرعه راحة فرحة وأمان
وإلا سال عني شعرك
لما الأنفاس تفتح فيه للهنا طرقان
وإلا سال عني نغمة
لما مفتاحه يتغير يولي تحنان
وإلا سال عني فمك
مفوه بالآه بشد اللذة ليها ميزان
وإلا سال عني حسك
كي يفرقني يفنى جهده يولي هيمان
وإلا سال عني نفسك
كي نشعلها بجذور النظرة خارقة الأجفان
عاد يمكن تدرك مني المعاني المسكوبة
وتدرك في المرا العاشقة المشبوبة
وتعرف علاش أنا ف شغافك مصبوبة
وتفهم كيفاش الأيام محسوبة
تحني وتبايع بالتسليم لشبشوبة
واخا بلاعذر
يا الصايل على قرانـــه
بنخوة هايلة مسرجــة
يا لهايم ف جنـــــان
ربيعه غابة مخلجـــة
يا الساقي بعيونــــه
خمرة طايلة مثلجـــة
هاج عطشـــي ماروي
زاد مرضـــي بلا دوى
يا طبيق الـــــورد
جواهره ضحكة مفلجـة
هايمة فيك اليــــوم
عيني عميا مزلجـــة
قاصدة الصدر الحنيـن
ليه أنا وحدة محوجــة
يا قلب وافـي بلا غـدر
جيتك وحــدي بلا عذر
وإلا حسبـــه ضربة
من راس اللحدة مخرجة
وحركات الهم حالفــة
في وحدي مزهجـــة
غرست ف القلب نصلـة
حافية مصدية معوجـة
ثقال حملــــي بلا قدر
ضيـاق شملي بلا صبر
وترد لعيني نظرة
فزينك والهة مفوجـــة
وتعيد لقلبي ساعـــة
من سوايعك باهية مخوجة
يتهنى بالـي وخاطـري
وروحي تفنى متوجـــة
ونقول أنا زيان سعـدي
الحبيب وفا لي بوعـدي
وخا جيته بلا عـــذر
غير بالشوفــة والنظر
فهم قصدي بالبطـــر
ونزل راسي على الصدر
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
