المدونة التالية
كافة المدونات

الزجال ادريس المسناوي في كناش التعاويد: السفر ف الذات

كتبها نهاد بنعكيدا ، في 20 أكتوبر 2007 الساعة: 15:15 م

السفر ف الذات
 
 
وقال لي اعرف من أنت فمعرفتك من أنت هي قاعدتك
التي لا تتهدم وهي سكينتك التي لاتزل
وقال لي إن لم تدر من أنت لم تفد علما ولم تكتب عملا
        النفري
 
 
زيارتي لأستاذي السابع خلقت لي استغراب . كنت تانتصور غنلقى عنده مكتبه زاخره بالكتب والمخطوطات. لكن اندهشت اندهاش كبير حين لقيتها خاويه كاتصفّر، ولا كتاب   واحد ! لما سوّلت الأستاذ على السر. قال لي: "ما كاين حتى سر ف الأمر". قلت له متعجّب "دار بلا مكتبه هذا أمر تا يحيّر. غيكون إما ضاعوا لك الكتب، أو لاشك أنك وضعتهم في مكان مأمّن"  ابتسم وقال "عمرهم ما كانوا عندي شي كتب باش يضيعـوا أوْ نفكر نوضعهـم ف مكان سري. الكتب ما تايتكتبوا غير باش يتقراوا…" قلت له متعجب "وانا آش تانعمل هنا عندك ؟ واش مطلوب مني ؟ أنا ما قمت بهذ السفر غير من أجل حاجه وحده…" قبل ما نكمل كلامي شدني من يدي، دخّلني لواحد البيت مظلام، سد ورايا الباب، قال لي "آش تاتشوف؟" قلت "ما تانشوف والو ! " قال لي "ما يمكنش، شوف وكان" . قلت "تانشوف الظلام". قال لي"و دبا؟". فذك اللحظه، اشعل الضو ولقيت راسي وسط الضواوات". قلت له: " تانشوف راسي وسط مرايات شبه دائريه، مرايه تحتي،  مرايه فوقي،   واخرين دايرين بيَّ . مجموعهم 18". كل مرايه كاتعطي ف لمرايات لخرين.
قال لي "وانت لمرايه كمالة  24   يمكن كمالة مائه و واحد… تحاور… حاور اخواتاتك…
قلت    "نحاور شكون ؟… نتحاور مع من ؟
قال لي : مع اللي معك
قلت    : ما معايا حد
قال لي : شوف و كان
قلت    : آش غنشوف ؟
قال لي : اللي ف جنابك، اللي وراك، اللي قدامك، اللي فوقـك، اللي تحـتك، اللي
         ف اعماقك.
ولهلم رايش    "شوف شويا ف ذاتك، اعرف نفسك على حقيقتها"
دوَّرت عيني معّنت الشوفه، قفزت من مكاني، قفز مكاني مني، قفزوا لمرايات. آش تانشوف ؟ تانشوف مخلوق، بل مخلوقات غريبه، ماهما بشر، ماهما حيوان، ماهما طيور. مخلوقات مشوهَه ممسوخه Métamorphosées ماتعرف راسهم من رجليهم ولا وجههم من قفاهم. مخلوقات ف مخلوق واحد، ومخلوق واحد ف مخلوقات. مخلوق بريوس ووجوه متعددة الاشكال والقامات. مخلوقات مقلوبين بحال السطوله. مخلوقات واقفين بحال شي قصيبات.بانت صورتي وسط لمرايات مشوشه. صوره مضببه، بان وجهي ف قفايا وقفايا ف وجهي. بان راسي بين رجلي، وبانوا رجلي فوق راسي وذنين. بان راسي صلع ووجهي كلُّـه مشعر.طلعت مع ذاتي ذاتي حتى لرجلي و عاود هبطت معها معها حتى لراسي بحال إلى تانفتش على شي حاجه منيِّ تالفَه وسط الما. لمّا التفت ف جنابي لقيت وجهي بعيد منّي طايح بحال شي مهزوم  و قفايا قبالته واقف عليه بحال شي عساس . و الضو حشمان , مضرَّق نص وجهُه,من حين لحين تايسرق الشوفه بنص عين .
حليت دماغي , دخلت راس سوقي , عرفت حقيقة الناس ف حقيقتي وحقيقتي ف حقيقة الناس، قلت اللي غنقولوا ف الناس راه حتى أنا فيَّ… أنا ها أنا أخيرًا لقيت راسي. ها أنا تحت أنا… ها أنا فوق أنا… ها أنا وسط أنا… أنا جنب أنا … أنا قدام أنا … أنا  ورا  أنا… أنا ف أنا…ها أنا بأنا…ها أنا ماشي أنا…ها ( أنا بلا أنا ). ها أنا ف اشباهي ولشباهي تانشوف, ها أنا ف اشباهي وباشباهي تانشوف. تانشوف ف ذاتي ذاتهم و فذاتهم ذاتي. تانشوف كلشي ف كلشي, تانشوف ف كلشي كلشي, وتانشوف كلشي ف والو, و والوا ف كلشي. تانشوف ذاتي بصيره باصره ومبصوره, تانشوفها شهيده وشاهده ومشهوده.
بيتي من جاج معمور. بيتي بيت الحكمه والعرفان والنور.
خرجت من عين الحياة لعين اليقين, كنت ف عين الحكمه عين.
عقلي شرب الخيال, والخيال شرب عقلي. كنت العقل العاقل , رِيتني ف محِّي سائل .كنت الرائي والمرئي,كنت المرايا والصوره . الكشف بابي والرؤيه مفتاحي. كانت الرمشه الأولى فعل والكلمه جناح السفر. كان الفعل طريق والخير اقدامه . درَّجت الحاضر فالمستقبل والمستقبل ف لبعيد ودرجت لبعيد ف المستقبل والمستقبل ف الخير. الخير, خير السفر, خير ماعنده لا صباح ولا مسا, لكن عنده النهار , عنده الضو, عنده الشمس ومعاها تايدور وظهره للديجور.
خالفت النفس, طحت ف الموت الحمرا, جوّعت النفس حتى بياض وجهي, حين غديتها من نور دواخلي لقيتني ف رياض الموت البيضا بين امواج لبحر لبيض. عريان , سترت عورتي بضو النهار , عيّشت نفسي عيشَه خضرا. عيشَه رماتني ف الموت الخضرا عود اخضر. كنت ف جنة الذات , ف لبحر لخضر , بعيون خوضر تانتلذذ جمال الكمال وكمال الجمال.سكر وجداني بانوار لحروف حتى فاض لمداد المكتوم من عروقي على صباعي . اكتب قال شبيهي. قلت  "آش غنكتب ؟ "  قال "اكتب ماهو كاين " ويكون وغيكون" .غمرني الحب بخمرته , كنت ف مقام الحيره , ملكني العشق  ,قوّاني . من اعماقي لاعماقي اخذتني لحروف من أنا ل بلا أنا صيرتني. ذهلت, أنا المذهول !  الذهول فناني , أنا الحي ف لمداد وبلمداد . أيلي حياني…..
رجعت لقيتني ف لمرايه مرايه . أنا مرايه ف مرايات. ولمرايات مرايه ف مرايتي. مرايات دايرين بيَّكايضحكوا… كايضحكوا، تسمع ضحكهم من بعيد. ما عرفتش واش كايضحكوا معايا ولاَّ عليَّ. لقني التساؤل كانضحك… كانضحك , ما عرفتش واش ع لمرايات ولا معهم ولا عليَّ.وانا وسط دوّامة التساؤلات والضحك، جاني الصوت. ما عرفتش واش منِّي ولاَّ م لمرايات، ولاَّ من اللي فيها. قلت ما قال المثل الشعبي  "جاري    يا مرايه، اذا شفت وجهي، تشوفي قفايا"
¢ ماذا لو أنك تقدم لينا حروفك حرف حرف.
u حروفي خمسه :
أولهم   : ألف، والألف ألف :  اقرأ، ادرس،  اغرس، اعمل، اكتب، انتج…
ثانيهم   : دال، والدال تايدل على درب معـانـق ديـور و دروب، تايقلـب ف لمدينه…فالخريطه على عين الزجل.
ثالثهم   : راء ، والراء رمل عطشان ما يرويه غير غمام الزجل.
رابعهم : يـاء، واليـاء حرف نـداء، تانادي بها علـى الناعـس فـيَّ، الناعـس ف اعماقي يفيق… يوقف… يتحرك… يتوقّد…
خامسهم : سين، والسين سين السفر: السفر ف احوال الناس، ف اعماق العالم، ف قنوات الثقافات…
¢ لوذن آش كاتمثل بالنسبه لك؟
u مخطاف كانخطف به الكلمه المدفونه، المحجوره ف سجن الذاكره الشعبيه. هي ردار كانلتقط به الكلمه الزينه، الصادقه من أفواه الشوارع والمقاهي والتجمعات والحفلات، وكذلك من افواه الإداعات والشاشات. كانخترق بها الحيطان والأصنام والشجر والآلات الموسيقيه.
الأذن : عين، قلب، عقل.
¢ والعين ؟
u كانحفر بها ف ملامح بني آدم، وف خبايا الكتب والتحف الفنيه، والحفريات والمآثر على ولادَه مقدَّسَه، على لغه راشده، واقفه على الزواج… ع الانجاب. لغه واقفه على سلوم كايطل على غدا.
كانخترق بها شعاب العالم اللي كانحلم بهم.
العين عين الضمير، عين لعقل، عين القلب، عين البصيره، عين الأذن.
العين اللي تشوف وجهي، وتقرا عيوبي بالجهر، قبل ما تقرا عيوب الناس.
العين اللي تعرّي على نفسي وتغسلها، تطهّرها بماء الإبداع. بماء الحب، بعرق لجبين.
¢ لمناخر ؟
u كانشمشم بهم الآثر ذ غدا الفالت من يدينا.
كانشمشم بهم على عش الزجل : ع الكنز المدفون فاللاوعي، فاللامرئي، ف شي جهه، ما نقول قريبه، ما نقول بعيده فينا… ف لاخر، فالمجهول.
¢ اليد ؟
u كانلمس بها على راس الخيط اللي يوصّلني لمح الفكره، لعمق الصوره.
اليد هي المهد اللي تايكبر فيه الدماغ.
اليد هي ذك اليد اللي م المفروض تنحتني، تنقشني، تنسجني م الداخل والخارج. اليد اللي تغيّرني، تصلحني قبل من شي حد آخر. اليد اللي ترفعني فوقها وهي مرفوعه للاعالي.
اليد الشامخه هي يد المبدع.
¢ اللسان ؟
u كانذوق به الكلمه اللي كاتطيب ف اعماقي، قبل ما نحطها نغمه ف وذن المتلقي، أوْ لقمه، أوْ فاكهه ف كف الورقه.
كاننشد به سحر الكلمه ف عراسي الحياة الجميله.
"لسانك هو حصانك، اذا صنته صانك ِوذا هنته هانك"
¢ الحدس ؟
u جنحين الدماغ اللي كانطير بهم، كانسابق بهم ريح لكتابه للورقه.
الحدس ضو الروح.
الحدس جوج درعين معنقين المستقبل.
الحدس عصاة عمايا. حدسي هو نصيب الهدف برمح الكلمه ف ظلام الليل. هو نتنبأ بالجاي.هو نتسابق مع راسي لما هو أحسن مني.
¢ الضمير ؟
u الضمير هو المحرك،  هو الطاقه،  هو الضو.
كاين الضمير الحي، وكاين الضمير لمريض أو الميت.
اللي تايهمنا احنا هو بالأساس الأول : الضمير الصاحي اللي تايمشي بصاحبه ف اتجاه
 الصحيح، اللي تايخدم الصالح العام والحياة الشريفه، وتايحرس على كرامة صاحبه.
¢ واذا انعدم الضمير ؟
u كايموت الحب، كاتتعفّن الحياة، كاتتلوّث العلاقات الاجتماعيه، وكاتفسد الأخلاق، وكاتتفشى الرشوه، كاتنحل القيم الإنسانيه، وكاتحل " الأنا " محل " نحن " ، وكايصير المال هو المقدس، وكاتطيح القيم سجينة الردائل والفحش والمنكر.
¢ لعقل ؟
u مفتاح مرئي، قل مفتاح من نور
فريد الدين العطار :  "ليس للعقل طريق في خلوته"
مثله مغربيه          "اهل العقول ف راحه" 
           "لعقل اللي ما ينفع ف الحزه ماشي عقل"
¢ الخيال ؟
¿مغناطيس العقل، ردار الحواس، كايطل ع العالم، بل كايملكه
الامام الغزالي " الخيال أول الادراك والرؤية هو استكمال ادراك الخيال وهو غاية الكشف."
ابن عربي :   - الخيال يعمل ما يراه العقل محالا
- الخيال رحم يصور فيه الخلق ما يشاء
- الخيال نور لا يشبه الأنوار
فيلو سطراط    "الخيال تايرفع المثل الأعلى".
أفلوطين :     الخيال تايساعد ف التفوق على الطبيعه.
هربرت ماركوز :  الخيال تايخلق واقعه الخاص اللي تايبقى محافظ على قيمته حتى و لو رفضه الواقع القائم.
بودلير " الخيال تايحلل الخلقيه بكلها، وم المواد المجمعه والمنظمه، وفقا لقوانين ما تاتوجد إلا ف أعماق النفس، تايخلق عالم جديد".
حوز العين تعاود لك. حوز لوذن تقرا لك. حوز لمناخر تعكز لك. حوز يديك  تكتب لك. ما يكتب همك غير ظفرك…
¢ النفس ؟
u فيها جوج : الأولى : أمّاره بالخير والمعروف، وهي مرّه على راس لمناخر، مرّه على راس الصباع كاتعمّر ريَّتها من هواء الحريّه.
الثانيه : أماره بالسوء، وهي تحت لقدام، تاتعمر ريتها من دخان الشر. كاتـقـتـات من نار لمكايد و الخدع و الغش
النفس قصبَه كايصوت فيها الريح
القلب بيانو كاتعزف عليه اصباع لفصول طقوسها الإلاهيه
جلال الدين الرومي   * إن أم الأصنام، صنم نفسك
 * النفس صانعة الأصنام
بوخريص    "النفس الخامده آش كاتعمل بها اليد البارده على الزنك اكويها"
نفسي تكون نفسي إلى تصارحني باللـي فـيّ  ِك تانصارحـها، تصالحنـي بالصـدق ِك تانصالحها. نفسي تكون عرسي إلآ توَرِّيني فين عش الحق.
نفسي تكون نفسي، عرسي، غرسي إلى تعمّر قصبتي برحيق العشق، ِك تانعمر جباحها بعسل روحي.
نفسي تكون نفسي إلى تنقّي وذنين الحيط م الخز، إلى تشطب طريق الضباب من الضباب، إلى تورّيني فين بايت صباحها .
¢ النفس رهينه، نابته بين الموت البيضا والموت الخضرا. الحلم مرّه مظل, مرّه جناح .الغفله حجاب تاينسِّينا ف النهارلكحل. الطموح عين زرقا, ماء الوجه, إذا احمار حياة ضاحكه بين وريقات زهره. واذا اصفار، قبر من سرُّه تعرَّى.
u قلت لجنِّي الساكني : اركل الدّنيا واعطيها بالوجه. فتّـش ع الحياة المدفونه، قلّب فيهـا ع الفرحه المفقوده، ف السما تهبط، فالأرض تطلع. وفرّق ع ليام أحلى بسمات، ولا تنساش نفسك العطشانه. فتّش ولو على نقطه ذ العرق فيك، وقطّرها ع الحياة، من أجل الحياة تنبت الفرحه وتزهر. فتّش ولو على ومضَة فرح تذوّب هَم المهمومين. فتّـش ولو على عضّـه ف الحياة تشق حجاب الغفله لعالم الحب والعمل.
¢ التواضع ؟
u مالقيتش احسن من التعريف اللي اعطاوه له المتصوفه:
* المحبّة والمودّة هما من ثمرات التواضع ونبتة طيبة من حقله الفسيح، فالمتواضع متصف بخلق القناعة،وراحة الضمير، وسلامة النفس، وصفاء الروح.
* تواضع الشريف يزيد في شرفه ومهابته
* تواضع العالم يزيد في علمه و فقهه
جلال الدين الرومي "حياة التواضع لا تصغر الانسان، إنها حياة تملأ، والعودة إلى ذات       بسيطة تكسب الحكمة"
المتنبي    " ملء السنابل تنحني تواضعا والفارغات رؤسهن شوامخ "
¢ الإحسان ؟
u الإحسان ماشي هو تحسن لللي أحسن لك، بل الإحسان هو تحسن لللي ساء لك، هكذا قريتها من افام المتصوفه ذ زمان…
متيرد      "قالت لودبا والعرفان ما لا يحسن باحسان ما يليه معرفه"
بن سليمان   آحفاظ لمعاني زيد الثقل ع البهايم
واخط عقود أهل الدعوات الناكرين الإحسان
مثلَه : الانسان عبد الاحسان
اذا كـان عـدوك أوْ كل الناس شـوك، كولهم بلسان ارطب. قالـوا زمان "اللسـان لحلو تايتعطـى ف الدِّيه".
¢ الحسد ؟
u تايقول المثل الشعبي المغربي: اللي حسدك اعطاك، بعباره اخرى، اللي حسدك قوّاك.
كلما اكـثـاروا حسّادك، كلمـا اكـثـار عطاءك وتضـاعفت قوتـك الإبداعيـه، غير اطلب الله يزيـد ف حسّادك.
¢ الحسود بحاله بحال الشجره لحرايميّه، ما تاتعطي كرموس وديما داير بها الناموس.
u الحسود ما تايحسد غير اللي احسن منه درجه. بمعنى أنه عمره ما تايحسد اللي أقل منه مكانه
¢ الحسد عود ما تايطيح غير ف عين الحسود.
u الحسد سلاح الفاشل ذاك اللي ما ف يديهش.
الحسد نار والحسود شجره.
الزجال ولد الرزين تا يقول "الحسد م الكفر" .
الزجال مدغليس   " نقرا سورة ياسين على قلب كافر"
المتصوفه  "الحسد أحسان أفعال الشيطان وأقبح أحوال الانسان.."
المثل الأندلسي : إن لم يشرب يعكّر (وتايقصد طبعا قلوب الشر).
¢ لكذوب ؟
u كاين اللي تايكذب على الناس: هذك طريق السياسي. لكذوب عكاز السياسي. مقواد الانتهازي.
وكاين اللي تايكذب للناس، أي هو مسخّر من حيث هو أصلا مستلب : نفاخه، فين ما مال الرّيح تاتميل.
كاين اللي تا يكذب على راسه : فم ومعشش فيه الدبان. قل بايض فيه الدبان.
¢ البياع ؟
u كاين اللي تايبيع بلاده. كاين اللي تايبيع خوته.كاين اللي تايبيع ضميره ، راسه ، شرفه، عرضه، صوته، عرقه، قلمه، أولاده، مستقبله….
¢ النكّار ؟
u كاين نكّار حسبه، وكاين نكار الخير، وكاين نكار شهادة ال
أضف الى مفضلتك
  • del.icio.us
  • Digg
  • Facebook
  • Google
  • LinkedIn
  • Live
  • MySpace
  • StumbleUpon
  • Technorati
  • TwitThis
  • YahooMyWeb

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج  

7 تعليق على “الزجال ادريس المسناوي في كناش التعاويد: السفر ف الذات”

  1. hamidma قال:
    أكتوبر 28th, 2007 at 28 أكتوبر 2007 1:26 م

    زميلي العزيز الزجال ادريس المسناوي.بكل صراحة اني بقراءتي المتانية لسطورك العطرة .وجدتني اما انسان اخر.لا اعرفه.امام انسان له من العمق الوجداني ما يجعلك ان تكون بحارا ماهرا لسبر اغوار ما ورائيات معانيك الجميلة المتضمنة في رحم حروفك الطاهرة.فلسفة وحكمة تؤهلك.لتقف على شط شاعر زاخر.يتدفق منه الابداع من كل جانب.اغبطك عزيزي على هدا العمق في تفكيرك والدي ينم على شاعريتك العميقة الغير مختلف في روعنها بين الاخوة الشعراء .

    الزجال: حميد تهنية / فاس

    sahara1920@hotmail.com

  2. hamidma قال:
    أكتوبر 29th, 2007 at 29 أكتوبر 2007 1:21 ص

    مدونة عظيمة كصاحبتها .لا ترضى بما دون النجوم مرتبة.

    الزجال : حميد تهنية / فاس

  3. مجهول قال:
    مارس 5th, 2008 at 5 مارس 2008 7:58 م

    الله

  4. ghiwania قال:
    يوليو 19th, 2008 at 19 يوليو 2008 10:52 ص

    السلام عليكم

    جميع كتابات و ازجال الاستاد الكبير سي ادريس المسناوي رائعة و عبقرية

    خصوصا كناش التعاويد.

    اتمنى لك التوفيق و الاستمرار في المزيد من العطاء و الابداع

    ولك الشكر الكبير الاخت نهاد على هده المدونة الجميلة

    تقبلو تحياتي و مروري

    اسية ابن سليمان

  5. مجهول قال:
    ديسمبر 25th, 2008 at 25 ديسمبر 2008 5:42 م

    اش هاد التخربيق

  6. najib قال:
    يناير 29th, 2009 at 29 يناير 2009 12:00 م

    http://www.youtube.com/watch? v=GKb43vmN4F

  7. najib قال:
    يناير 29th, 2009 at 29 يناير 2009 12:02 م

    http://najib59.maktoobblog.com



اكتب تعليــقك
الإسم الذي سيظهر على التعليق
مشتركي مكتوب
اسم آخر

« الزجال ادريس المسناوي في كناش التعاويد: السفر ف لبحور